قصة واقعية
الكلام ده صدقوا وختوا في بالكم.
منقووول
واقف في سوبر ماركت شلت بامبرز ولبن بدرة وزيتون وشوكلاتا لي ولدي ، الحساب طلع سبعمية الف وشوية فأثناء مابعد في القروش سمعت طفل بيقول لي بتاع الدكان عليك الله اديني ظرفين ، بتاع الدكان يقول ليهو قروشك ماتامه ، تاني يحنس فيهو ، قمت قلت ليهو الود دا عاوز شنو ؟ فقال لي دا داير ظرفين كاتشاب وقروشو 2 جنيه وديل بي 3 ، فقلت ليهو اديهو مامشكلة ، كان منظر الطفل وملابسو وسفنجتو المترمة القديمة بتدل إنو فقير ، مكتوبة في وشو ، فنيلتو المخرمة ، بنطلونو ، (فقير في اغنى بلد في الثروات في العالم ) !!!!
تابعتو ومشيت وراهو براحة وصل الفرن الجمب البقالة ، دخل يدو جوا جيبو وقعد يبحت وطلع جنيه حديد إشترى بيهو عيشة وبتاع الفرن اللصق البقالة بتاعت الجوهرة أداهو عيشة زيادة ، حسيتو فرح شديد وقعد في الواطة فتح عيشة وحشاها بي كيس كاتشاب !!!!
أكلا بي نهم وشال العيشة التانية ومعاها كاتشبا ومشى ، حصلتو في الشارع الداخلي ،
إزيك ياولد إسمك منو ؟ فلان ، بتقرى وين ؟ لا انا بس قريت سنه اولى وطلعوني شان ماعندنا قروش . ابوك وين ؟ ابوي امي قالت لي مات لكن اولاد الجيران قالو لي شرد مننا
وبيتكم وين ؟
اهنداك
طلع اوضة وبرندة من الخشب (كشيقة) ، طيب انت ليه بتحشي الكاتشاب ؟ لانو ماعندي قروش طعمية لكن لمن الطماطم يبقى رخيص امي بتشتري كتير تختو تحت الزير نآكل كتييير لمن نشبع ، (لا حولا ولا قوة إلا بالله) عندك اخوان ؟ لا بس اختي كانت عيانة عندها وجع بطن وماتت هسي انا وامي برانا (فيما بعد عرفت إنها ماتت من سوء التغذية) !! ، هسي العيشة دي حقت منو ؟! دا ساندوتش أمي (ساندوتش كاتشاب)!!
خليتو ومشيت بعد عرفت البيت وخجلت من روحي شديد يعني في نفس الحته والسكن اكون شايل شوية حاجات بي سبعمية الف وفي طفل زي ولدي مازن ماعندو 5 جنيه حقت طعمية !!
في البيت رقدتا ورجع بي الشريط وبكيت لساعتين متواصلات لهذه المأساة وقعدت افكر في الإمبريالية ، الرأسمالية المتوحشة ، الديكتاتورية والفساد وتماسيح الأسواق وووو صدعتا ونمت .
الصباح بدري خليت شغلي يعلم الله بس بفكر في حل للطفل وأمو ، إتصلت بي صديقة مليانة إنسانية عطوفة وعديلت درب مشينا دقينا باب ام الطفل دي جابت لينا موية من الزير لقيناها غير كلمة (الحمد لله) مافي شي في خشمها لقينا الاوضة دي إيجار اصلا وبيدفع ليها الإيجار اخوها شغال في ولاية تانية ولمن تقطع قروش اكل بتخجل تحملو فوق طاقتو شان كدا بتقوم تضطر مرات تحشي الكاتشاب ساندوتشات وهو ارخص طعام بعد الملح وطلع كل كلام ولدا حقيقة بالحرف .
لميت أصدقائي الرجال الجد البثق فيهم بالجد الرجولة مواقف والانوثة زاااتا مواقف واوريكم كيف ، قعدتا مع اصحابي ديل حكيت ليهم القصة في ظرف 48 ساعة إتصلو بي جو بي عربية صالون وبكس (مروق القرش حاار لكن الأحر منو موت الضمير)، البكس فيهو تلاجة مستعملة نضيفة ، جميع انواع الخضروات ، مواد تموينية لغاية الباكمبودر ، فواكه ، وصلناها نزلنا التلاجه وباقي الحاجات ، بكاها ابكى بعض اصدقائي
صديقتنا الكنداكة كمان جات بي ناسا وراها نسوان يسدو عين الشمس بايعات الدنيا جابو ليها ملابس وقروش مبلغ كبير ماشاء الله إنتهينا من مرحلة الألم لكن فكرتا بالليل وانا راقد كم اسرة ممكن تكون زي دي وأكعب من كدا ؟!
البلد دي فقيرة لدرجة إنو بيحشوا الكاتشاب ساندوتش وجبتين كمان فقط !!
ليكم تتخيلو معاي :
في بلد فيها اكبر ثروة حيوانية اكتر من140 مليون رأس ماعز وخراف وبقر وجمال وخيول!! اكبر مساحات اراضي صالحة للزراعة ملايين الفدانات !! تحت الأرض كل معدن خلقو الله في الأرض (دهب ، يورانيوم ، حديد ، كروم ، دهب ، احجار كريمة ماس وزمرد وعقيق) بكميات غير محددة للآن !! اطول وأعذب ماء نهر في العالم (نهر النيل) وكميات مهولة من الآبار الجوفية بتحلم بيها شعوب تانيه !!! وثروة سمكية تكفي لإطعام جميع شعوب العالم !! مناطق سياحية وتاريخية حضارية ومحميات ممكن تدخل مليارات الدولارات في السنة الواحدة !! بعد كدا عقول سودانية فذة كانت سبب في نهضة دول كتيرة في العالم !!
لكن بعد دا للأسف تلقى
-طفل بيطلعوهو من مدرستو شان ماعندهم حق الدراسة !!
-اب يفر بجلده من اطفاله شان ماقدر يعيشهم !!
-طفل في الثامنه من عمره بيضطر يكذب ويتخذ اساليب الفهلوة مع بتاع بقالة شان يحنك منو ظرف كاتشاب !!
-جيران بالحيطة مابيتفقدو جارن الأوصى بيهو النبي لغاية سابع جار ومايقدرو يعرفو لي حيائه إنو ماعندو تمن ساندوتش طعمية فبيقوم يآكل كتشب !!
-ديوان زكاة فخم من 8 طوابق بالأسانسير بينتظر زي طفل الكاتشاب دا يجيهم ويكتب طلب ويتردد من مكتب على مكتب تاني شان يطلعو ليهو 150 جنيه بعد مايكون صرف قدرها في ركوب المواصلات !!
ياناس ياسودانيين ياهووو والله في ناس مسحوقين قراب منكم إتفقدوهم اقلاهو لو لقمة العيش بس لانو في ناس ممكن يموتو فعليا من الجوع وإنت ماجايب خبر
جغمة أخيرة :
ياناس الحكومة : يوم الحساب سيسأل الله هذا الطفل وستندمون .
ماعاوز زول يتباهى بالصلوات وقيام الليل وحلقات الذكر ، تقعد تحج كل سنة بي 140 مليون وجارك بيحلم بي 140 جنيه
اطعم جارك دا بيت الله زاتو بيحج ليك لو كنا جد (مؤمنين) .
في عهد سيدنا عمر بن عبدالعزيز إشتكى عمال بيت مال المسلمين من عدم وجود مكان لتخزين الزكاة من كثرتها ، فلم يجدوا محتاج ليعطوه زكاة ، بنوا البيوت وسددوا عن فقراء المسلمين والمسيحيين واليهود ، ومازالت الاموال تفيض ، فقال عمر :
أنثروا القمح على رؤوس الجبال تأكل منه الطير حتى لا يقال جاع طير في بلاد المسلمين
ياااااااه ليت اطفالنا كانوا طيرا في عهدك ياعمر
